Соопштенија
PRM-portret
Честитка по повод одбележувањето на 24 Мај - Денот на македонските и сесловенските просветители и учители, светите браќа Кирил и Методиј
Четврток, 24 Мај 2018

Претседателот на Република Македонија, д-р Ѓорге Иванов, упати честитка по повод одбележувањето на 24 Мај - Денот на македонските и сесловенските просветители и учители, светите браќа Кирил и Методиј.

Почитувани сограѓани,

Дозволете ми да Ви го честитам државниот празник, 24 Мај - Денот на македонските и сесловенските просветители и учители, светите браќа Кирил и Методиј.

Одбележувајќи го овој голем ден, ние се поклонуваме пред ликот и делото на светите браќа Константин-Кирил и Методиј. Создавајќи ја и проширувајќи ја глаголицата од Македонија, Кирил и Методиј старословенскиот јазик го трансформираа во првиот пишан јазик на словенските земји на кој е преведено Светото писмо и на кој христијанството се прошири меѓу Словените. Со тоа, тие всушност создадоа единствен комуникациски код што им овозможи на словенските народи рамноправно да се интегрираат во заедничкиот европски духовен, културен и политички простор. Нивните ученици станаа учители на целото словенство и нераздвоен дел од Европа. Она што старословенскиот беше за словенството, тоа е современиот македонски јазик за нашето мултиетничко македонско општество – заеднички јазик кој овозможува рамноправна интеграција без асимилација на сите нејзини членови.

Делото на сесловенските просветители св. Кирил и Методиј, треба да биде наша водилка во градењето на општество достојно на вредностите кои тие ни ги оставија. Да бидеме горди на нивното наследство, да си го чуваме и почитуваме сопствениот јазик и сопствената култура.

Нека е вечно нивното име и нека ни е за многу години големиот празник Свети Кирил и Методиј!

д-р Ѓорге Иванов

PRM_Palmer
Средба на претседателот Иванов со г. Метју Палмер, заменик-помошник секретар во Стејт Департментот на САД
Среда, 23 Мај 2018

Претседателот на Република Македонија, д-р Ѓорге Иванов, денеска го прими г. Метју Палмер, заменик-помошник секретар во Стејт Департментот на Соединетите Американски Држави.

Македонскиот претседател изрази очекување дека ќе продолжи американската поддршка за надворешно политичките цели и приоритети на Република Македонија - интеграцијата во евроатлантските структури, НАТО и ЕУ, добрососедските односи и регионалната соработка.

„Република Македонија останува целосно посветена на исполнување на политичките критериуми за членство во НАТО и Европската унија. Процесите на интеграција се клучни за стабилноста и благосостојбата на земјата и се во интерес на целиот регион", порача македонскиот претседател.

На средбата беа разменети мислења за актуелните состојби во Република Македонија како и за тековните случувања во процесот на разговорите за надминување на разликата околу името.
Претседателот Иванов истакна дека Република Македонија ќе продолжи конструктивно да учествува во разговорите, но дека процесот мора да остане во рамката утврдена од страна на Обединетите нации. На средбата со г. Палмер, претседателот Иванов уште еднаш ја истакна потребата за почитување на обврските од Уставот и законите со цел информирање за текот на разговорите и посочи дека очекува да му биде одговорено на барањето за достава на предлог-пакетот за решавање на спорот и белешките од паралелните разговори помеѓу министрите за надворешни работи и премиерите на двете земји.

Двајцата соговорници се согласија за натамошно зацврстување, збогатување и унапредување на стратегиското партнерство меѓу Република Македонија и САД.

prm_vlasi
Честитка од претседателот Иванов по повод 23 Мај - Националниот ден на Власите
Среда, 23 Мај 2018

Претседателот на Република Македонија, д-р Ѓорге Иванов упати честитка до припадниците на Влашката заедница во Република Македонија, по повод 23 Мај - Националниот ден на Власите.

Почитувани сограѓани,

По повод Националниот ден на Власите, 23 Мај, дозволете ми, вам, на припадниците на влашката заедница во Република Македонија да ви го честитам големиот празник.

Овој значаен празник е потсетување на вековниот стремеж на Власите за зачувување и промовирање на својот сопствен јазик, култура и традиција. На овој ден, 23 Мај 1905 година, Османлиската Империја донесе Ираде со кое само беше призната реалноста дека Власите се посебен народ со свој јазик, култура и идентитет. Со тоа се отвори ново поглавје во долгата и исклучително богата историја на Влашкиот народ. Таа историја сведочи за едно нешто. А тоа е дека Власите и како народ, но и како поединци имале голема улога во борбата за слобода, државност и независност на Република Македонија.

Припадниците на влашката заедница се дел од сите сфери на општественото живеење, со што даваат препознатлив придонес во целокупниот развој на Република Македонија. Исклучително одговорниот однос на Власите кон својата држава Република Македонија и кон своите сограѓани од другите етнички заедници може да послужи како пример за градење и за негување на меѓусебна доверба. Таквата доверба е потреба на секој поединец и претставува врзивно ткиво на целото македонско мултиетничко општество. Обврска на Република Македонија е да продолжи да го чува, развива и промовира етничкиот, јазичниот и културниот идентитет на Власите во духот на европските вредности.

Честитајќи ви го денешниот празник, дозволете ми да го изразам своето уверување дека со заеднички напори ќе продолжиме да работиме во интерес на Република Македонија, градејќи подобра и посветла иднина за сите граѓани.

д-р Ѓорге Иванов

PRM_grb
Претседателот Иванов ја прифаќа поканата за информативна средба иницирана од премиерот
Петок, 18 Мај 2018

Претседателот на Република Македонија, д-р Ѓорге Иванов, имајќи ги предвид важноста на прашањето за името и државните интереси на Република Македонија, ја прифаќа поканата за информативна средба, иницирана од г. Зоран Заев, Претседател на Владата на Република Македонија, закажана за утре,19 мај 2018 година.

Информираме дека до денеска, 18 мај 2018 година, до Кабинетот на Претседателот на Република Македонија не се доставени целосни одговори на барањата упатени на 29 март 2018 година, вклучително и нацрт-текстот на билатералната спогодба за надминување на разликата околу името, доставен од Министерството за надворешни работи на Република Грција.

Сметаме дека на тој начин се врши селективно информирање на македонскиот претседател.

Претседателот Иванов на утрешната средба очекува да биде информиран за суштината и за деталите од разговорите во процесот за надминување на разликата околу името.

Kuchan
Средба со г. Милан Кучан, поранешен претседател на Република Словенија
Среда, 16 Мај 2018

Претседателот на Република Македонија, д-р Ѓорге Иванов, денеска го прими г. Милан Кучан, поранешен претседател на Република Словенија, кој престојува во посета на Република Македонија.

На средбата двајцата соговорници разменија мислења за севкупните односи меѓу Република Македонија и Република Словенија, состојбите во двете земји и актуелните случувања во регионот.

Македонскиот претседател изрази благодарност за досегашната отворена и безрезервна поддршка од Република Словенија во однос на македонските аспирации за членство во Европската унија и во НАТО, потенцирајќи дека Република Македонија во Република Словенија секогаш гледа искрен пријател и партнер. Република Словенија ја покажа својата солидарност кон Република Македонија и за време на мигрантската криза.

Во таа насока, претседателот Иванов изрази очекување дека и во периодот кој следи ќе продолжи соработката меѓу двете земји во сите сфери од заеднички интерес, на планот на европските и евроатланските интеграции на Република Македонија, како и во рамки на регионалните иницијативи.

Поранешниот претседател Кучан истакна дека Европската Унија мора да има активна улога и да ја отстрани пречката што Грција ја поставува на патот на македонските евроинтеграции.

„Со европските реформи, Република Македонија си го заврши својот дел од работата, останува на Европската Унија да го заврши својот дел од работата", подвлече поранешниот словенечки претседател.

PRM
Честитка од претседателот Иванов по повод почетокот на рамазанските пости
Вторник, 15 Мај 2018

Претседателот на Република Македонија, д-р Ѓорге Иванов, по повод почетокот на рамазанските пости, упати честитка до поглаварот на Исламската верска заедница во Република Македонија, Реис-ул-улема Хаџи Сулејман ефенди Реџепи, до членовите на Ријасетот и до сите припадници на исламската вероисповед во Република Македонија.

Почитуван Реис–ул–улема Хаџи Сулејман ефенди Реџепи,

Дозволете ми, Вам лично и на членовите на Ријасетот, муфтиите, имамите и на сите граѓани од исламска вероисповед во Република Македонија, да Ви упатам честитки по повод почетокот на рамазанските пости.

Во исламот, Рамазан е светиот месец, тоа е месец на молитва, добрина, простување, милосрдие и љубов. За време на Рамазан се слави духовното воздигнување и телесното прочистување.

Деновите на пост се можност за секој верник да го отвори своето срце кон великодушноста и хуманоста, помагајќи им на сиромашните и изнемоштените, и молејќи се за простување на своите гревови.

Нека овој празник биде поттик за меѓусебно помагање и почитување бидејќи само заедно, почитувајќи ги разликите ќе успееме да изградиме посветла иднина за сите граѓани на Република Македонија.

Во духот на празникот Ви посакувам лесни рамазански пости. На сите припадници на исламската вероисповед во земјава им посакувам мир, благосостојба, љубов и проштавање.

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 1 од 161