Соопштенија
PRM_Ruci
Средба на претседателот Иванов со претседателот на Собранието на Р. Албанија, г. Грамоз Ручи
Понеделник, 10 Декември 2018

Претседателот на Република Македонија, д-р Ѓорге Иванов, денеска го прими претседателот на Собранието на Република Албанија, г. Грамоз Ручи.

Претседателот Иванов и претседателот на албанското Собрание, г. Ручи разменија мислења за севкупните билатерални односи меѓу Република Македонија и Република Албанија, констатирајќи дека политичките односи бележат позитивен тренд на развој, со континуиран политички дијалог и учество во заедничките иницијативи и активности на билатерално, регионално и мултилатерално ниво.

Двајцата соговорници констатираа дека Република Македонија и Република Албанија споделуваат идентични надворешно-политички цели во контекст на европските интеграции, добрососедските односи и регионалната соработка, како клучни предуслови за стабилност и просперитет на регионот. Претседателот Иванов и претседателот на албанското Собрание, г. Ручи  се согласија дека парламентарната соработка може дополнително да се развива преку интензивирање на контактите помеѓу парламентарните тела и комисии.

На средбата беа разгледани можностите за соработка меѓу двете земји во контекст на интеграцијата во ЕУ, а од македонска страна беше изразено очекувањето за активна поддршка од Република Албанија во однос на членството во НАТО.

На средбата беше истакната и потребата за заедничка посветеност за забрзување на реализацијата на тековните инфраструктурни проекти, како и унапредување на економската соработка меѓу двете земји.

На средбата, македонскиот претседател изрази задоволство од усвојувањето на Законот за малцинства од страна на Парламентот на Република Албанија и изрази очекување дека истиот ќе придонесе за подобра заштита и афирмација на културните и јазичните идентитетски одлики на етничките Македонци во Албанија.

PRM_portret_01
Честитка од претседателот Иванов по повод државниот празник 8 Декември - Свети Климент Охридски
Сабота, 08 Декември 2018

Претседателот на Република Македонија, д-р Ѓорге Иванов, по повод празникот Св. Климент Охридски упати честитка до Архиепископот Охридски и Македонски г.г. Стефан.

Ваше Блаженство,

Дозволете ми, од свое име и од името на граѓаните на Република Македонија, Вам лично, на членовите на Светиот архијерејски синод на Македонската православна црква, на преподобното свештенство, како и на сите православни верници во земјата и во странство, да Ви упатам најискрени и најсрдечни честитки по повод големиот празник Св. Климент Охридски.

Овој празник е посветен на првиот македонски архиепископ и најдаровитиот ученик на сесловенските браќа светите Кирил и Методиј, Св. Климент Охридски.

Климент Охридски со своите благо угодни зборови го упати народот во верата, а со своите дела се издигна кон божествениот и блажен живот.

Ликот и делото на Св. Климент Охридски се силно врежани во македонската историја. Неговото дело и мисија се должни за почит, но и поука за сите идни генерации дека чувањето на културната и јазична посебност е исконска должност.

Чествувањето на вакви големи празници е темелна премиса за јакнење на духовноста и почитување на христијанските вредности.

Неговото црковно и просветно дело треба да биде наш пат, водилка и вечна инспирација за добри дела.

Честит празник и за многу години!

д-р Ѓорге Иванов

KabinetPRM
Реакција од Кабинетот на Претседателот на Република Македонија на соопштението на СДСМ
Петок, 07 Декември 2018

Кабинетот на Претседателот на Република Македонија остро реагира на соопштението на СДСМ и истото го оценува како очаен обид да се обвини Генералниот секретар на Кабинетот, г. Борис Јосифовски за наводна вмешаност во настаните од 27 април.

Ја разбираме нервозата кај СДСМ поради неуспешното спинување на вистината околу 27 април и прикривање на катастрофалните грешки, како и сопствената неспособност во водење на државата, но со цел да спречиме натамошно шпекулирање и ширење на дезинформации, сакаме да ја информираме јавноста дека присуството на Борис Јосифовски во штабот на ВМРО-ДПМНЕ на 27 април не е непознат факт.

Генералниот секретар на Кабинетот на Претседателот во Основното Јавно Обвинителство уште во месец ноември, минатата година, под целосна морална и правна одговорност даде детален исказ за сите негови движењa и остварени контакти, и одговори на сите поставени прашања.

Ја потсетуваме партијата СДСМ, дека Борис Јосифовски е член на ВМРО-ДПМНЕ и како член на таа партија нема ништо спорно да биде присутен во седиштето на партијата. Истовремено посочуваме дека присуство, не подразбира и инволвирање во конкретни активности. Присуството на Јосифовски во штабот на ВМРО-ДПМНЕ на 27 април беше со цел да оствари договорена средба што нема никаква поврзаност со какво било координирање на некакви активности за наводно прогласување на воена, или вонредна состојба. Откако беше повикан од страна на  Претседателот Иванов со цел да го свика Кабинетот, Јосифовски се врати на работното место.

Согласно Уставот на Република Македонија, слободата на движењето е загарантирано човеково право, освен ако во меѓувреме не настанала нова реалност, за која не знаеме.

PRM_portret_01
Сочувство од Претседателот на Република Македонија, д-р Ѓорге Иванов по повод смртта на г. Љубиша Георгиевски
Четврток, 06 Декември 2018

Сочувство од Претседателот на Република Македонија, д-р Ѓорге Иванов по повод смртта на г. Љубиша Георгиевски.

Почитувани,

Со голема тага ја примив веста за смртта на нашиот режисер, писател и професор Љубиша Георгиевски.

Иако немам соодветни зборови кои можат да ја опишат големината на загубата, дозволете во овие тажни мигови да изразам најискрено и најдлабоко сочувство на неговото семејство и на целата македонска јавност. Со смртта на Љубиша Георгиевски загубивме голем интелектуалец, уметник и патриот. Со своето уметничко дело остави неизбришлива трага во македонскиот театар и филм инаугурирајќи се во креативен и мислечки бард на македонската уметност и култура. Зад него останаа повеќе од 160 театарски претстави и неколку играни филмови кои ја издржаа критиката на времето. Љубиша Георгиевски со својата луцидност, творечка храброст и човечка доблест беше наша гордост и инспирација.

Во текот на исклучително богатата политичка и дипломатска кариера мошне одговорно и креативно ги одигра своите улоги на претседател на Собранието и амбасадор во Софија и во Белград каде ревносно ги бранеше државните интереси на Република Македонија. Како член на мојот Совет за меѓународни односи, тој даваше мудри совети и промислувања за клучните прашања за Република Македонија.

И преку својот уметнички и преку општествениот ангажман до крајот на својот живот, Георгиевски се бореше за македонската кауза останувајќи верен на своите вредности, ставови и убедувања.

Вечно ќе сме благодарни за сè што направи за Република Македонија и за наследството кое ни го остави и кое ќе остане патоказ и светлина за идните генерации.

Вечна му слава и нека почива во мир.

д-р Ѓорге Иванов

Polska1
Средба на претседателот Иванов со полскиот претседател Анджеј Дуда
Понеделник, 03 Декември 2018

Претседателот на Република Македонија, д-р Ѓорге Иванов, во рамки на учеството на Самитот за климатски промени COP 24, што се одржува во Катовице, одржа билатерална средба со претседателот на Република Полска, г. Анджеј Дуда.

На средбата беа разменети мислења за севкупните билатерални односи меѓу Република Македонија и Република Полска, при што беше констатирано дека двете земји негуваат пријателски и конструктивни односи, со стабилен политички дијалог.

Претседателот Иванов изрази благодарност за целокупната поддршка на Република Полска од воспоставувањето на дипломатските односи кои годинава одбележуваат 25 години како и за употребата на нашето уставно име во билатералните односи.

Истакнувајќи дека Република Полска е важен и докажан партнер и поддржувач на македонската интеграција во ЕУ и во НАТО, македонскиот претседател го изрази интересот за натамошно продлабочување на билатералната соработка преку размена на посети на највисоко ниво.

На средбата беа разменети мислења и информации за мигрантската и бегалска криза, при што претседателот Иванов се заблагодари за досегашната помош од страна на Република Полска. Во тој контекст, македонскиот претседател нагласи дека полскиот контингентот како дел од на странските полициски сили дава значајна поддршка на македонските безбедносни сили во контролирањето и сузбивањето на обидите за илегални премини на нашата јужна граница.

Претседателот Дуда посочи дека полската поддршка за Република Македонија како во однос на нашите евроатлантски интеграции така и за мигрантската криза ќе продолжи и во иднина.

На средбата беа разменети мислења за севкупните состојби во регионот, во контекст на неговата европска и евроатлантска перспектива.

Polska2

PRMportret
Сочувство од претседателот Иванов по повод смртта на Џорџ Х. В. Буш, поранешен претседател на САД
Сабота, 01 Декември 2018

Претседателот на Република Македонија, д-р Ѓорге Иванов упати писмо со сочувство до Џорџ В. Буш, поранешен Претседател на Соединетите Американски Држави, по повод смртта на неговиот татко, Џорџ Х. В. Буш, поранешниот претседател на Соединетите Американски Држави.

Почитуван господине Претседател,

Со длабоко жалење ја примивме веста за смртта на Вашиот татко Почитуваниот Џорџ Х. В. Буш, поранешниот претседател на Соединетите Американски Држави.

По тој повод, дозволете ми, во мое лично име, како и во името на граѓаните на Република Македонија, да ги упатам изразите на нашето длабоко сочувство и искрено жалење за Вашата загуба.

Името на Претседателот Буш ќе остане длабоко врежано во сеќавањето на македонските граѓани. Граѓаните на Република Македонија ќе го паметат како голем пријател и поддржувач на нашата земја, во време кога се соочувавме со сериозни предизвици и големи искушенија. Соединетите Американски Држави под водството на Џорџ Х. В. Буш ја поддржаа одлуката на македонските граѓани за самоопределување и прогласување на независна и суверена држава. Таа политика беше дополнително унапредена под Ваше водство кога донесовте принципиелна одлука да го признаете уставното име Република Македонија. Република Македонија и македонските граѓани никогаш не ги забораваат своите пријатели.

Ние му остануваме благодарни и за посветеноста кон зачувување и зајакнување на пријателството и соработката меѓу нашите две земји и народи.

Нека почива во мир.

д-р Ѓорге Иванов

 
Почеток < Пред 1 2 3 4 5 6 7 8 9 10 Следно > Крај
Страница 1 од 170